Të enjten e tetë dhjetorit, në Leposaviq, është tentuar të plaçkitet ndërtesa e Bankës Kombëtare të Serbisë, ku si pasojë është plagosur një person.
Siç shkruan REL, në këtë incident janë përdorur armë zjarri.
Sipas informatave të qendrës shëndetësore lokale, në këtë incident ka mbetur i plagosur një punonjës i kompanisë Henderson, e cila transporton para për nevojat e bankave.
Policia e Kosovës nuk ka qenë në vendngjarje as gjysmë ore pas incidentit.
Aty më pas kanë mbërritur pjesëtarët e EULEX-it, misionit të Bashkimit Evropian për sundimin e ligjit.
Policia e Kosovës është instanca e parë intervenuese për sigurinë, EULEX-i i dyti dhe misioni i NATO-s në Kosovë, KFOR, i treti.
Pjesëtarët serbë që kanë punuar në Policinë e Kosovës, e kanë braktisur këtë institucion në fillim të nëntorit, si shenjë pakënaqësie ndaj një vendimi të Qeverisë së Kosovës për riregjistrimin e makinave me targa serbe në RKS – Republika e Kosovës.
Përveç Policisë së Kosovës, serbët lokalë kanë braktisur edhe institucionet e tjera lokale dhe qendrore në Kosovë.
Komuniteti ndërkombëtar ka paralajmëruar se një vendim i tillë ka krijuar vakuum që mund ta përkeqësojë situatën e sigurisë.
Për incidentin në Leposaviq raportohet dy ditë pas shkatërrimit të objekteve të Komisionit Qendror Zgjedhor të Kosovës në Mitrovicën e Veriut dhe Zubin Potok, komuna po ashtu të banuara me shumicë serbe.
Zgjedhjet për komunat veriore – Mitrovicë e Veriut, Zubin Potok, Leposaviq e Zveçan – janë caktuar për 18 dhjetor, pasi kryetarët e tyre kanë dhënë po ashtu dorëheqje për shkak të vendimit për targat.