Liderët e opozitarë kanë përkujtuar 21-vjetorin e sulmeve terroriste ndaj Shteteve të Bashkuara të Amerikës.
I pari i Partisë Demokratike të Kosovës, Memli Krasniqi, përmes një postimi në Facebook, ka përkujtuar ditën kur ShBA-të janë sulmuar nga terroristët.
“Sot, me dhembje kujtojmë 11 shtatorin e vitit 2001, kur Shtetet e Bashkuara të Amerikës u goditën nga sulmet terroriste, që morën jetën e rreth 3 mijë personave”.
“Ajo që ishte menduar të ishte goditje për SHBA-të dhe botën demokratike, vetëm sa i bashkoi të gjithë, për tu ngritur më fuqishëm e më guximshëm se kurrë kundër terrorizmit dhe në mbrojtje të më të shtrenjtës: Lirisë”, ka shkruar Krasniqi.
Më tej, ai ka theksuar se Kosova qëndron pranë popullit mik amerikan për të kujtuar këtë ditë dhe për të ndarë dhembjen e pikëllimin me ta.
Sulmet terroriste të 11 shtatorit dhe humbjen e 3 mijë jetëve 21 vjet më parë, i ka përkujtuar edhe kryetari i Lidhjes Demokratike të Kosovës, Lumir Abdixhiku, përmes një postimi në Twitter.
“21 vjet më parë, 3000 jetë humbën në sulmet terroriste të 11 shtatorit. Sot ne kujtojmë dhe nderojmë viktimat, familjet e tyre dhe heronjtë që ndihmuan në kohën e nevojës”, ka shkruar Abdixhiku.
21 years ago, 3000 lives were lost in the 9/11 terrorist attacks.
Today we remember and honor the victims, their families, and the heroes who helped in the hour of need.#neverforget pic.twitter.com/rvcIvTmqVb
— Lumir Abdixhiku (@LumirAbdixhiku) September 11, 2022
Ndërsa 21-vjetorin e sulmit e ka përkujtuar edhe lideri i Aleancës për Ardhmërinë e Kosovës, Ramush Haradinaj. Përmes një postimi në Facebook, ai ka thënë se 11 shtatori i vitit 2001 ka ndyshuar përgjithmonë kursin e globit.
Ndër të tjera, ai ka thënë se sulmi terrorist ka lëkundur botën, por nuk e ka thyer popullin amerikan.
“Në një ndër ditët më të zeza të historisë moderne, sulmi terrorist i paprecedentë kundër Shteteve të Bashkuara, lëkundi botën por nuk e theu shpirtin e madh amerikan. Qëndresë, fitore, liri dhe demokraci. Në njëzet e një vjetorin e 9/11, ashtu si çdo ditë, jemi pranë miqve amerikanë, pranë botës demokratike, duke kujtuar me respekt viktimat e asaj dite”, ka shkruar Haradinaj.
Të dielën e 11 shtatorit janë shënuar 21 vjet nga sulmi i 19 individëve, përkatësisht, 15 nga Arabia Saudite, dy nga Emiratet e Bashkuara Arabe, një nga Egjipti dhe një nga Libani.
Katër aeroplanë kryen sulme duke goditur Kullat Binjake në Nju Jork, Pentagonin në Uashington dhe një avion u rrëzua në Pensilvani. Nga ky sulm mbetën të vdekur afër 3 mijë persona.