Superliga zvicerane, FC Zurich ka bërë të ditur përmes një komunikate se ka arritur marrëveshje me futbollistin nga Kosova, Lindrit Kamberin, që të rinovojnë kontratën.
Mbrojtësi 22-vjeçar ka firmosur kontratë të re me klubin zviceran, e që do ta mbajë atë deri në verën e vitit 2025.
“Klubi ka kënaqësinë të njoftojë se ka rënë dakord për një zgjatje të kontratës trevjeçare me Lindrit Kamberin deri në verën e vitit 2025”, thuhet fillimisht në komunikatën e Zurichut.
Kamberi si mbrojtës qendror në lojë, ka përfunduar pjesën më të madhe të stërvitjes së tij në Fussballclub Zürich, zakonisht i shkurtuar në FC Zürich (FCZ), dhe është paraqitur në 18 ndeshje konkurruese me ekipin e tij deri më tani, duke shënuar një gol me kokë në ndeshjen kundër klubit zviceran, FC St.Gallen.
Për të fituar praktikën e ndeshjeve dhe për t’u zhvilluar më tej, Kamberi ishte huazuar në FC Wil për sezonin 2019/2020.
Ndërsa, gjatë sezonit 2020/2021, ai ishte nën kontratë si huazim në FC Winterthur përpara se të kthehej në klub para kohe në mars 2020.
Drejtori sportiv i Zurichut, Marinko Jurendic, ka thënë për rinovimin e kontratës, se Kamberi ka vazhduar të zhvillohet gjatë viteve të fundit, dhe se e ka cilësuar si të rëndësishëm për ekipin e tyre.
“Lindriti ka vazhduar të zhvillohet gjatë viteve të fundit, nga kapiteni në U21 te përformuesi më i mirë në Challenge League, tek profesionist i besueshëm në Superligë. Me personalitetin e tij pozitiv dhe vullnetin e madh për të përformuar, ai është një lojtar i rëndësishëm për ekipin tonë” , ka thënë ai.