Pas dënimit me një vit burg, për ish-ministrin të Administrimit të Pushtetit Lokal (MAPL), Ivan Todosijeviq, ka reaguar “Lista Serbe” në Kosovë, e cila e ka cilësuar këtë vendim si të turpshëm dhe të motivuar politikisht.
Në reagim thuhet se vendimi për ta dënuar Todosijeviqin është diskriminues dhe nuk është i bazuar në ligj.
Po ashtu, kanë thënë se kjo është një formë presioni për qytetarët e nacionalitetit serb që jetojnë në Kosovë.
“Populli serb dhe ne përfaqësuesit e tij politikë e hedhim poshtë si farsë këtë vendim të turpshëm, të pabazuar dhe politikisht të motivuar, sepse ai nuk ishte i bazuar në ligj dhe drejtësi, por në forcë dhe motive politike”, thuhet në reagimin e tyre.
Todosijeviq është dënuar për shkak të mohimit të masakrës së Reçakut, në të cilën, forcat serbe kanë vrarë 45 shqiptarë të Kosovës, në vitin 1999.
Ish-ministrit, Ivan Todosijeviq, i është ngritur aktakuza në korrik të vitit 2019.
Ndryshe, Todosijeviq kishte qenë ministër i Ministrisë së Administrimit të Pushtetit Lokal (MAPL) në Qeverinë e Kosovës, nga radhët e Listës Serbe, e cila ishte në bashkëqeverisje me PDK-në, AAK-në, Nismën Socialdemokrate dhe AKR-në.
Po në vitin 2019, ish-kryeministri i Kosovës, Ramush Haradinaj, e kishte shkarkuar atë nga kjo pozitë, pas deklaratës fyese që kishte bërë për Masakrën e Reçakut.
Sipas aktakuzës së ngritur më 28 qershor 2019, Ivan Todosijeviq, duke keqpërdorur pozitën apo autorizimin e tij, me dashje, ka nxitur dhe përhapur publikisht urrejtje, përçarje dhe mosdurim midis grupeve kombëtare, racore dhe etnike që jetojnë në Republikën e Kosovës.