Çmimi dominues për një litër naftë standarde, në pikat e mëdha të shitjes me pakicë, është 1 euro e 28 centë.
E deri në fundjavën që shkoi një litër naftë në të njëjtat pika kushtonte 1 euro e 30 centë.
Madje për naftë të cilësisë më të lartë shkonte deri në 1 euro e 37 centë.
Sidoqoftë, ka edhe pika të shitjes që një litër naftë e shesin pak mbi 1 euro e 20 centë.
Por, çmimi mesatar i importit në katër ditët e para të Dhjetorit, sipas statistikave të Doganës, sillet rreth 1 euro e 5 centë për litër – përfshirë taksat.
Pra, deri në 25 centë më pak sesa shitja në pikat me pakicë, për naftë standarde.
Madje, sipas të statistikave që Dogana i ka përcjellë TV Dukagjinit, më 4 Dhjetor, në një rast çmimi mesatar i importit ishte 97.5 centë për litër duke përfshirë taksat.
Apo, 32 centë e gjysmë dallim me çmimin e shitjes në tregun vendor.
Ministria e Industrisë, Ndërmarrësisë dhe Tregtisë, respektivisht inspektorati përgjegjës për tregun e naftës, nuk janë përgjigjur në pyetjet e televizionit nëse janë në dijeni të këtyre dallimeve, e as nëse do të ndërmarrin ndonjë veprim.
Viteve të fundit, kjo ministri, nëpërmjet një udhëzimi administrativ disa herë kishte vendosur çmime tavan për naftën – duke kufizuar marzhën e fitimit për shitjen me pakicë në 12 centë për litër.
Sidoqoftë, në mungesë të veprimit institucionalë mbikëqyrës, kjo masë nuk është respektuar gjithmonë.