Analisti politik, Shkëlzen Maliqi, e ka analizuar sulmin e djeshëm terrorist të një grupi serb ndaj Policisë së Kosovës, ku një polic mbeti i vrarë dhe dy të tjerë të lënduar.
Sipas tij, terroristët ishin pjesëtarë të shërbimeve sekrete serbe dhe ruse, dhe se kishin për qëllim inskenimin e një masakre në Manastir të Banjskës, do të fajësohej shteti i Kosovës, ku pastaj Serbia do ta arsyetonte intervenimin ushtarak në veri.
“Terroristët e shërbimeve sekrete serbe dhe ruse, si duket e kanë pas qëllimin e inskenimit të masakrës në Manastirin Banjska, ku viktimat do të ishin pelegrinët nga Vojvodina dhe murgët serbë, për ta akuzuat pastaj Policinë e Kosovës si terroriste, dhe kështu nxitur rebelimin e serbëve në veri dhe arsyetuar intervenimim ushtarak për gllabritjen e Veriut të Kosovës”, tha ai.
Ky skenar, sipas Maliqit, nuk është i panjohur. Sipas tij, kështu ishte organizuar edhe masakra në kazermën e Paraqinit, ku ishte akuzuar pa të drejtë shqiptari Aziz Kelmendi.
“Nuk është skenar i panjohur. Kështu ka qenë e organizuar masakra në kazermën e Paraqinit, ku u vranë në gjumë pesë ushtarë të armatës jugoslave dhe si vrasës u akuzua shqiptari Aziz Kelmendi, i cili u gjet i vramë në një pyll afër kazermës dhe u tha se e ishte vetëvrarë. Pas rastit të Paraqinit, Sllobodan Milisheviqi mori pushtetin e plotë në Serbi dhe nisi projektin e shkatërrimit të Jugosllavisë për ta krijuar Serbinë e madhe”, tha ai.
Po ashtu, Maliqi e përmendi edhe rastin “Panda”, ku ishin vrarë disa serbë, nga vetë shërbimi sekret i Serbisë, për ta paraqitur UÇK-në organizatë terroriste.
“I ngjashëm ka qenë edhe rasti i vrasjes së 5 të rinjve serbë në kafiterinë ‘Panda’ në Pejë, për të cilin vetë presidenti Vuçiq ka pranuar publikisht se ka qenë i organizuar nga shërbimet sekrete serbe për ta paraqitur si krim të UÇK-së dhe shpallur atë organizatë terroriste dhe jo çlirimtare. Prindërit e viktimave në rastin ‘Panda’ prej kohësh kërkojnë nga Vuçiq që të tregojë në prokurori të vërtetën se kush janë vrasësit e të rinjve serbë, por ai po i shmanget premtimit se do ta bën këtë, me gjasa u bë pishman se e ka përmend fare”, ka shkruar ai.
Rasti në Manastirin e Banjskës, sipas analistit Maliqi, mund të shërbejë që të ndriçohen edhe shumë inskenime të tjera të Serbisë.
“Banjska mundet të jetë rast që të ndriçohen edhe strategjia e inskenimit të krimeve makabre për të arritur kthesa historike, jo vetëm si atë në Paraqin dhe Pejë, por edhe në disa raste të ngjashme në lufën e Bosnjës, p.sh. vrasjen me snajper të çiftit të dasmorëve serb në Sarajevë, pas të cilit akt filloi lufta dhe rrethimi gati katërvjeçar i Sarajevës.
Nëse kjo vërtetohet në hetimet, e informatat dhe gjurmet çojnë në atë drejtim, policia dhe inteligjenca kosovare, me gjasa në bashkëpunim me atë perëndimore, do të arrijë një fitore të madhe në demaskimin e kësaj ligësie makabre me rrezik për paqen dhe sigurinë në rajon dhe më gjerë”, ka thënë ai.