Një person është dënuar me 100 ditë burgim me kusht dhe 200 euro gjobë, pasi i njëjti ka pranuar se në korrik të vitit 2020, përmes rrjetit social “Facebook”, e ka mashtruar të dëmtuarin me inicialet N.Sh, i cili gjendej në Milano të Italisë.
I akuzuari P.B., thuhet se kishte hapur një e-mail të rremë me emrin e një kushëriri të të dëmtuarit, duke thënë se ndodhet në burg në Kosovë dhe se i duheshin 800 euro për të dalë nga burgu, me ç’rast nga i dëmtuari pranon 750 euro.
Aktgjykimi në fjalë është shpallur më 28 shtator të vitit të kaluar, nga gjykatësi i Gjykatës Themelore në Gjilan, Behar Yemri, pasi i akuzuari P.B. e ka pranuar fajësinë për veprën me të cilën ndarkohej, raporton “Betimi për Drejtësi”.
Sipas Prokurorisë Themelore në Gjilan, i akuzuari e kishte hapur një e-mail të rremë me emrin “L.L.” dhe të dëmtuarit i ishte paraqitur se kinse është kushëriri i tij me emrin Sh. dhe se ndodhet në burg në Kosovë ku i kishte kërkuar para në shumë prej 800 euro, kinse për të dalë nga burgu.
Në këtë rast, në aktakuzë thuhet se i dëmtuari i beson të akuzuarit dhe ia dërgon shumën prej 750 euro, me ç’rast i akuzuari ka marrë këto para në filialin e “Money Gram”.
Me këtë, P.B. akuzohej se ka kryer veprën penale “Mashtrimi”, nga neni 323, paragrafi 1 të Kodit Penal, vepër kjo e dënueshme me gjobë dhe me burgim prej tre muaj deri në pesë vjet.