Platforma e punësimit “superpuna”, e prezantuar nga Qeveria e Kosovës, ka për qëllim punësimin e mbi 10 mijë të rinjve. Për këta të fundit që punësohen për herë të parë, shteti do të subvencionojë pagën minimale në vlerë 264 euro.
Së fundmi, nga kjo platformë kanë bërë të ditur se janë 6 mijë e 785 pozita të lira, ku të rinjtë e moshave 18 deri në 25 vjeç mund të aplikojnë.
“6785 pozita të lira pune në superpuna. Të rinjtë e moshave 18-25 vjeçare të interesuar për mundësi punësimi”, thuhet në njoftimin e tyre.
Zhvillimi i platformës “superpuna” është bërë me mbështetjen e Qeverisë Zvicerane.
Qëllimi i “superpuna” është ndërmjetësimi i të rinjve punëkërkues 18-25 vjeç me punëdhënës potencial. Punëdhënësit mund të jenë nga sektori privat, publik dhe sektori joqeveritar.
Përmes “superpuna”, çdo punëdhënës mund të angazhojë deri në 30% të stafit të tyre ekzistues. Pra, nëse një biznes ka 10 të punësuar, përmes “superpuna” mund të angazhojë edhe 3 punëtorë të rinj.
Pas ndërmjetësimit të suksesshëm në mes të punëdhënësve dhe punëkërkuesve, Qeveria bën subvencionimin e pagës prej 264 eurosh në muaj, për 6 muaj me radhë. Çdo punëdhënës ka të drejtë që të shtojë vlerën e pagës për punëtorin e angazhuar.