Ministri i Mbrojtjes, Armend Mehaj, të martën ka pritur në takim kongresmenin amerikan, Ritchie Torres.
Në këtë takim, ai ka thënë se i ka rikujtuar Torresit kërkesën e Kosovës për vendosjen e një baze të përhershme ushtarake amerikane në Kosovë që do të shërbente si garanc për sigurinë, paqen dhe stabilitetin e përgjithshëm të rajonit.
Po ashtu, në këtë takim, Mehaj me Torres kanë diskutuar për sigurinë në vend.
Ministri Mehaj ka theksuar se vizioni shtetëror i Kosovës është anëtarësimi në NATO duke qenë gjithmonë në koordinim me ShBA-në.
“Sikur edhe në takimet e mia të mëhershme me kongresmenin Torres, edhe këtë radhë e njoftova me situatën aktuale të sigurisë në vend pas krizës në Ukrainë, dhe ndikimit destabilizues rus përmes qasjes destruktive të Serbisë kundër Kosovës dhe në përgjithësi kundër paqes, sigurisë dhe stabilitetit të rajonit tonë”, ka shkruar Mehaj në Facebook.
Mehaj, ndër të tjera, e ka falënderuar Torres-in për gjithë mbështetjen e dhënë ndaj Kosovës.
“Duke i dëshiruar mirëseardhje në vendin tonë, kongresmenit Torres i shpreha edhe këtë radhë falënderimin dhe mirënjohjen e thellë për gjithë mbështetjen e dhënë nga ai në Kongresin Amerikan për ne, SHBA-së si vend aleat jetik dhe popullit amerikan si komb mik yni”.
