Drejtori i Agjencisë për Menaxhimin e Emergjencave, Genc Metaj, ka deklaruar se pavarësisht angazhimit maksimal të të gjitha njësive, deri më tani nuk është arritur të gjendet trupi i mërgimtarit që dyshohet se u mbyt në liqen të dielën.
“Kemi angazhuar të gjitha njësitë – zjarrfikësit, Policinë, Shoqatën për Kërkim-Shpëtim dhe grupin e zhytjes Trepça. Policia ka qenë non-stop në terren. Si Agjenci koordinuese në raste emergjente kemi ndërmarrë të gjitha masat, por me kapacitetet aktuale nuk kemi pasur sukses për të gjetur trupin e personit të humbur, me këtë arsyeje me veprim ndërinstitucional i kemi marrë të gjitha veprimet”, ka deklaruar Metaj para mediave.
Ai bëri të ditur se për këtë arsye, Agjencia ka kërkuar angazhimin e Forcës së Sigurisë së Kosovës (FSK), e cila sot tashmë ka dalë në terren dhe ka nisur punën.
“Kërkesën për angazhimin e FSK-së e kemi bërë dje. Ata sot janë këtu dhe janë duke e kryer punën e tyre. Agjencia është në proces të ngritjes së kapaciteteve”, u shpreh Metaj.