Ministri i Jashtëm turk, Mevlut Çavusoglu, duke iu referuar provokimeve të fundit terroriste në Suedi ka thënë se kjo e fundit po rrezikon “qëllimisht” anëtarësimin e saj në NATO.
Lidhur me provokimet e grupeve terroriste kundër Turqisë dhe presidentit Recep Tayyip Erdogan, Çavusoglu ka thënë se “I takon Suedisë të vendosë nëse do të pastrojë minat apo do t’i shkelë. Nëse shkel, do të shpërthejë”.
“Organizatat terroriste po hedhin mina në rrugën e anëtarësimit të Suedisë në NATO. Suedia po shkel qëllimisht mbi këto mina. Ato mund t’i pastrojnë ato nëse duan”, ka thënë Çavusoglu në një takim të partisë AK në qytetin Alanya, shkruan Anadolu Agency.
Suedia dhe Finlanda aplikuan zyrtarisht për t’u anëtarësuar në NATO majin e kaluar, vendim i nxitur nga lufta e Rusisë kundër Ukrainës.
Sipas memorandumit të nënshkruar qershorin e kaluar midis Turqisë, Suedisë dhe Finlandës, të dy vendet nordike u zotuan të ndërmarrin hapa kundër terroristëve për të fituar anëtarësimin në aleancën e NATO-s.
Në marrëveshje, Suedia dhe Finlanda ranë dakord të mos ofrojnë mbështetje për grupet terroriste si PKK dhe degët e saj, dhe organizatën terroriste FETO, dhe të ekstradojnë të dyshuarit për terrorizëm në Turqi, ndër të tjera.