Ministri i Bujqësisë, Faton Peci, ka zhvilluar një takim me drejtorin e Bankës Botërore për Kosovë dhe Maqedoninë e Veriut, Massimiliano Paolucci.
Përmes një postimi në Facebook, ministri Peci ka thënë se gjatë këtij takimi është diskutuar rreth mundësive të thellimit të bashkëpunimit, me synim ngritjen e kapaciteteve bujqësore të vendit përmes investimeve në ujitje.
Ai ka paralajmëruar se së shpejti do të nënshkruhet një marrëveshje për një grant në vlerë 10 milionë euro, për sistemin e ujitjes.
“Me qëllim që t’i adresojmë në mënyrë sa më efikase sfidat e sektorit, Banka Botërore si një partner i rëndësishëm vijon ta mbështes vendin tonë nëpërmjet instrumenteve financiare dhe asistencës teknike, me ç’rast kam kënaqësinë që së shpejti përmes fondeve të Bashkimit Evropian dhe partnerit implementues; Bankës Botërore do ta nënshkruajmë një marrëveshje bashkëpunimi për një grant të ri në vlerë prej 10 milionë euro për investime në ujitje”, shkroi ministri.
Sipas tij, ky dikaster do të vazhdojë të punojë ngushtë me partnerë vendorë e ndërkombëtarë, për të zbatuar projekte dhe iniciativa të përbashkëta, që për qëllim kanë mirëqenien e qytetarëve të Kosovës.