Drejtori ekzekutiv i Institutit të Kosovës për Drejtësi (IKD), Ehat Miftaraj, pas miratimit të Projektligjit për ndryshimin dhe plotësimin e ligjit për skemat pensionale të financuara nga shteti ka fajësuar qeverinë për “mashtrim” të opinionit publik.
Përmes një postimi në Facebook, Miftaraj ka kërkuar nga qeveria “që të mos e ofendojë inteligjencën e popullit”, pasi siç thotë ai, kjo qeveri nuk ka pasur vullnet politik ta miratojë ligjin për skemat pensionale, por është detyruar nga Gjykata Kushtetuese me aktgjykim.
“Qeveria të mos provojë të mashtrojë opinionin publik. Është marre të rrejnë dhe të mashtrojnë kaq hapur. Mos na ofendoni inteligjencën. Nalnu! Kjo qeveri nuk ka pasur vullnet politik të miratojë ligjin për skemat pensionale, e ka detyruar Gjykata Kushtetuese me aktgjykim. E kanë pasur obligim kushtetues dhe ligjor të zbatojnë vendimin e Gjykatës Kushtetuese”, ka shkruar Miftaraj.
Ndryshe, të enjten e 27 korrikut, me 62 vota për, asnjë kundër dhe asnjë abstenim, deputetë të Kuvendit kanë miratuar Projektligjin për ndryshimin dhe plotësimit e Ligjit për skemat pensionale të financuara nga shteti, i cili do t’ua njohë pensionin kontributdhënës me mijëra qytetarëve.