Kryetari i PSD-së, Dardan Molliqaj ka reaguar lidhur me vendimin e MINT-it për mediumin Klan Kosova.
“Një Qeveri që i lufton mediat është e drejtuar kundër njerëzve. Një Qeveri që i mbyllë mediat do errësirë dhe nënshtrim. Qeverisja bëhet regjim teksa ndjell heshtje dhe frikë. Ata që duan të na mbyllin na shohin si idiotë që mashtrohemi nga secila propagandë. Prandaj heshtje varri”, ka shkruar Molliqaj.
Sipas Molliqajt, Qeveria “po e zëvendëson” shkakun e gjendjes së jashtëzakonshme.
“Armiku i jashtëm po zëvendësohet me armikun e brendshëm. Tash që po tërhiqet nga veriu, një armik na duhet. Sepse ndryshe, kushedi, zbresin njerëzit nga eteri e mozomakeq këtu poshtë mbreti është cullak”, ka thënë kreu i PSD-së.
Ai ka shtuar se ky vend i ka të afërta dhe të lidhura lirinë dhe luftën. “Liria nuk jepet, luftohet për të. Mësymja e Qeverisë është kërcënim me diktaturë”, ka shkruar ndër të tjerash Molliqaj.
Ministria e Industrisë, Ndërmarrësisë dhe Tregtisë përmes një njoftimi ka bërë të ditur se Komisioni për Shqyrtimin e Ankesave për Regjistrimin e Bizneseve ka marrë sot vendim për refuzimin e ankesës së Shoqërisë Tregtare “Klan Kosova sh.p.k.”.
Kështu, ky Komision ka konstatuar se ARBK-ja “në shkallën e parë, ka vendosur në përputhje me ligjin kur e pezulloi certifikatën e biznesit të Klan Kosovës sh.p.k.”.