Kryetari i Partisë Social Demokrate, Dardan Molliqaj, ka thënë se kryeministri i Kosovës, Albin Kurti, tashmë është përcaktuar pro Asociacionit të komunave me shumicë serbe.
Sipas kryetarit të PSD-së, Asociacioni në baza etnike, do të ishte projekt i dëmshëm për Kosovën.
Molliqaj ka thënë se çdo marrëveshje e ngjashme me asociacionin do të ishte e papranueshme për Kosovën.
“Korniza e këtij dialogu nuk ka destinacion mirëqenien e qytetarëve. Çdo marrëveshje që krijon realitet të ri në baza etnike në Kosovë është absolutisht i papranueshëm dhe do të kundërshtohet”, ka shkruar Molliqaj në Facebook.
Kryeministri i Kosovës, Albin Kurti ishte kundër Asociacionit të komunave me shumicë serbe sa ishte në opozitë, dhe deklarativisht është shprehur kundër edhe si kryeministër.
Ndërkaq, i dërguari i Shteteve të Bashkuara të Amerikës për Ballkanin Perëndimor, Gabriel Escobar, të mërkurën një ditë para takimit në Bruksel, në mes të krerëve të Kosovës dhe Serbisë, ka thënë se Kosova e ka obligim ta formojë Asociacionin me shumicë të komunave serbe, por sipas tij kjo duhet të bëhet sipas ligjeve të Kosovës.