Pas sulmit me granatë dore në objektin e komunës së Mitrovicës së Veriut, Ministria e Punëve të Brendshme ka reaguar duke i quajtur këto sulme terroriste.
Në një postim në faqen zyrtare të ministrisë në Facebook, thuhet se Policia ka marrë masat e menjëhershme për hetimin e rasteve dhe identifikimin e autorëve.
Sipas MPB-së, nga ky akt janë dëmtuar edhe dy vetura zyrtare që gjendeshin pranë objektit.
“Vazhdojnë sulmet terroriste ndaj institucioneve shtetërore. Mbrëmë në orët e vona, ndërtesa e Komunës së Mitrovicës së Veriut është sulmuar me mjet shpërthyes, që sipas ekspertizës dyshohet të jetë granatë dore e llojit M75. Nga ky akt kriminal, janë dëmtuar dhe dy vetura zyrtare që gjendeshin pranë objektit. Policia e Kosovës ka marrë masat e menjëhershme në investigimin e rastit dhe identifikimin e autorëve”, thuhet në reagimin e ministrisë.
“Sulmet e vazhdueshme terroriste ndaj institucioneve të Republikës së Kosovës, duhet të përballen me reagim të ashpër nga të gjithë”, vijon tutje reagimi.
Sipas MPB-së, këto janë tentativa të njëpasnjëshme nga ana e Serbisë, për të eskaluar situatën në veri të vendit.
“Ne mbesim vigjilent dhe të angazhuar për rend dhe siguri për të gjithë qytetarët pa dallim”.