Ministri i Financave, Hekuran Murati, ka thënë se në Kosovë ka biznese apo segmente të tyre që abuzojnë me çmime. Sipas tij, kjo kishte ndodhur edhe me çmimin e benzinës dhe se abuzim është ndaluar kur Qeveria e Kosovës ka vendosur që të caktojë një çmim tavan.
Kritikave të opozitës për ndërhyrje në tregun e lirë, Murati i është kundërpërgjigjur se mirëqenia e qytetarëve është e garantuar me kushtetutë, dhe se sipas tij, është prioritet për Qeverinë e Kosovës.
“Një ditë para se të merrej vendimi për çmimet tavan për derivate, benzina ka qenë për 18 centë më e shtrentjë, kur ka hy vendimi në fuqi është liruar në 18 centë”, ka deklaruar Murati.
“Gjithsej fitimi për një litër benzinë i tregtarëve ka qenë 30 centë për litër. Pra, argumenti se do të bankrotojnë supermarketet, për disa mund të jetë brengë supermarketet, por për neve është brengë mirëqenia e qytetarëve, sepse kjo mbizotëron në kushtetutë”, ka vijuar ai.
Murati është shprehur se çmimet tavan i caktojnë edhe vendet e rajonit, siç është ai i Shqipërisë dhe Maqedonisë së Veriut. Sipas tij, vendosja e çmimeve tavan për produktet bazë do t’i ndalonte abuzimet me çmime.
“Çmimi i bukës u vendos përnjëherë të rritej, përkundër faktit që çmimi i grurit dhe miellit ka shënuar rënie, pra ka abuzime të tilla edhe për produkte bazë, ky ligj është i domosdoshëm, sepse rezultati është parë te derivatet”, ka deklaruar Murati.
Ministri i Financave, e ka kritikuar opozitën se gjatë qeverisjes së tyre nuk e kanë pasur prioritet mirëqenien e qytetarëve.