Eksperti i sigurisë, Agim Musliu, ka reaguar pas zhvillimeve të fundit në Zveçan, ku në një bastisje të institucioneve të sigurisë është gjetur një arsenal armësh në objektin e politikanit serb Aleksandar Arsenijeviq.
Musliu, që është edhe kryetar i bordit të Institutit “Octopus”, ka theksuar se nisma për krijimin e të ashtuquajturave “Roje të Lagjes” nuk ka qenë aspak një formë e vetëmbrojtjes qytetare, por një organizim me potencial të rrezikshëm terrorist.
Sipas tij, prapa këtij organizimi qëndrojnë struktura shtetërore të Serbisë.
“Nisma e Aleksandar Arsinijeviq për të krijuar të ashtuquajturat “Roje të Lagjes” u prezantua si një rezistencë qytetare dhe jo e dhunshme. Por faktet po flasin ndryshe.
Zbulimi dhe konfiskimi i armëve nga institucionet e sigurisë shpërfaq një realitet shqetësues: qëllimi nuk ishte vetëmbrojtja, por organizimi i celulave të strukturuara me potencial terrorist.
Të gjitha gjasat tregojnë se pas kësaj skeme fshihen kanale mbështetëse të drejtpërdrejta nga Serbia – përmes Ministrisë së Mbrojtjes të Republikës së Serbisë dhe rrjeteve të saj të sigurisë.
Ky nuk është aktivizëm – është një skenar i rrezikshëm për destabilizim dhe minim të rendit kushtetues në veri të Kosovës”, ka shkruar Musliu në Facebook.