Si “të mjerueshme” e ka cilësuar gjendjen e Policisë së Kosovës Deputetja nga radhët e Partisë Demokratike të Kosovës (PDK), Ganimete Musliu.
Në “Debat Plus” të RTV Dukagjini, Musliu ka deklaruar se policia nuk i ka disa nga kushtet bazë dhe një çështje e tillë, “u neglizhua” nga deputetët e LVV-së në Kuvend.
“Sot i kemi Policinë e Kosovës në gjendje të mjerueshme, me paga të ulta, pa shtesa, pa uniforma adekuate, pa ligjin për pensionim që e ngrita para një muaji e nuk nuk ka as një muaj dhe deputetët e LVV-së nuk e patën guximin…rastisi të vinte tash kur situata është e tensionuar në veri dhe Policia e Kosovës nuk ka pas asnjëherë më shumë punë. Vjen vetëm një deputet i LVV-së që diskuton për ligjin dhe krejt çka thotë “duhet komunikuar ndryshe me Kryeministrin”, ka deklaruar ajo.
Musliu fajëson Kurtin për vendosjen e policve mbi 60 vjeç në terren pavarësisht problemeve shëndetësore duke theksuar se pjesa më e madhe e tyre punojnë në sekondare.
Ajo thekson se ka nga ata policë që kanë filluar t’i shqyrtojnë mundësit e të larguarit nga Kosova.