Ministrja e Arsimit, Shkencës, Teknologjisë dhe Inovacionit, Arbërie Nagavci ka thënë se MASHTI ka ndërmarrë të gjitha masat e nevojshme, ashtu që afati i dytë i testit të maturës të realizohet ashtu siç ishte paraparë.
Gjersa u ka uruar maturantëve rezultate sa më të larta, Nagavci ka falënderuar personelin e angazhuar në organizimin dhe mbarëvajtjen e provimit të maturës.
“Kjo është një ditë e rëndësishme, sepse do të tregoni aftësitë dhe shkathtësitë tuaja të fituara përgjatë arsimit parauniversitar. Andaj, uroj që secili nga ju të arrini rezultate sa më të larta të cilat do t’ju mundësojnë të vazhdoni tutje shkollimin e lartë. Si Ministri i kemi ndërmarrë të gjithë masat që ky proces të realizohet si duhet dhe pres edhe nga ju që të respektoni rregullat dhe udhëzimet e dhëna. Një falenderim i veçantë edhe për të gjithë personelin e angazhuar në organizimin dhe mbarëvajtjen e Provimit të Maturës”, ka shkruar Nagavci, mëngjesin e së shtunës.
Afati i dytë i provimit të maturës shtetërore do të mbahet të shtunën e 27 gushtit, bën të ditur Ministria e Arsimit, Shkencës, Teknologjisë dhe Inovacionit (MAShTI).
Testimit të dytë do t’i nënshtrohen rreth 5084 maturantë në 59 qendra të testimit. Ndërkaq, në këtë proces do të angazhohen rreth 177 komisionerë, 70 mbikëqyrës, 50 vëzhgues nga organizata rinore KYC, si dhe 600 administrues.
Të shtunën, mbahet afati i dytë i provimit të maturës shtetërore