Kryetari i Lidhjes Demokratike të Kosovës (LDK), Lumir Abdixhiku në 33-vjetorin e themelimit të kësaj partie ka bërë homazhe te varri i ish-presidentit të Kosovës, Ibrahim Rugova.
Abdixhiku para mediave ka thënë se këtë ditë së bashku me anëtarët e LDK-së e kanë nisur duke nderuar presidentin historik, prijësin e shqiptarëve në periudhën më të vështirë të popullit të Kosovës.
“Nisëm këtë ditë për të nderuar presidentin historik, prijësin e shqiptarëve në periudhën më të vështirë të popullit tonë dhe themeluesin e LDK-së”, ka deklaruar Abdixhiku.
Ndër të tjera, i pari i LDK-së ka thënë se rruga e “ish-presidentit Rugova dhe LDK-së vazhdon të mbetet e njëjtë edhe pas 33 vjetësh”.
“Meqenëse edhe Kosova dorëzoi aplikimin për anëtarësim në BE, dhe aspiratat e saj janë për BE e NATO, asaj që është bërë 33 vite më parë duhet t’i japim edhe një herë drejtim për të jetësuar ëndrrën e kamotshme”, ka vijuar ai.
Ndryshe, të premten e 23 dhjetorit, LDK-ja shënon 33 vjetorin e themelimit të saj.