Kryeministri i Kosovës, Albin Kurti, në kuadër të Konferencës së Sigurisë në Mynih, të shtunën e 18 shkurtit, ka takuar deputetë të Bundestagut nga radhët e Partisë Socialdemokrate, Partisë Liberale dhe Unionit Demokristian.
“’Gjermania është një vend mik dhe aleate në marrëdhënie bilaterale dhe në integrimin Evropian të Kosovës’, tha kryeministri Kurti, gjatë takimit me deputetët Andreas Schwarz, Wolfgang Hellmich, Ulrich Lechte, Renata Alt, Aydan Özoğuz dhe Metin Hakverd”, njofton Zyra e Kryeministrisë.
Në këtë takim kryeministri Kurti e ka nënvizuar performancën ekonomike, përparimin demokratik, progresin në digjitalizimit të shërbimeve, politikat sociale në shërbim të qytetarëve, suksesin në luftimin e korrupsionit si veçori që e kanë përshkuar vendin tonë në dy vitet e fundit.
I pari i ekzekutivit i ka njoftuar deputetët gjermanë që Qeveria e Kosovës tashmë ka miratuar tri marrëveshjet e nënshkruara në kuadër të Procesit të Berlinit. Të njëjtat shumë shpejt priten që të ratifikohen edhe në Kuvend.
“Në takim u diskutua edhe për raportet me Serbinë dhe propozimin evropian të iniciuar nga Gjermania dhe Franca, për normalizim të marrëdhënieve ndërmjet Kosovës dhe Serbisë”, thuhet tutje në njoftimin e Kryeministrisë.
Bëhet e ditur që në këtë takim, kryeministri Kurti ka qenë i shoqëruar nga zëvendëskryeministrja dhe ministrja e Punëve të Jashtme dhe Diasporës, Donika Gërvalla dhe ambasadori i Kosovës në Gjermani, Faruk Ajeti.