Ned Pric, zëdhënës i Departamentit të Shteteve te Bashkuara të Amerikës, ka lëshuar një komunikatë ku ka kerkuar nga kryeministri i Kosovës, Albin Kurti dhe presidenti i Serbisë, Aleksandar Vuçiq, që të përmbahen nga veprimet dhe provokimet të cilat e cenojnë paqen.
Sipas Price, SHBA-ja është e zhgënjyer nga liderët e Kosovës dhe Serbisë pasi këta të fundit, nuk kanë arritur të bien dakord për zgjidhjen e krizës aktuale në Kosovë.
“I bëjmë thirrje kryeministrit Kurti që të punojë me Përfaqësuesin e Lartë të BE-së, Josep Borrell dhe Përfaqësuesin Special të BE-së, Miroslav Lajçak, për të arritur një kompromis të drejtë”.
“Si kryeministri Kurti, ashtu edhe presidenti Vuçiq do të duhet të bëjnë lëshime për të siguruar që të mos rrezikojmë paqen e fituar me dekada me vështirësi në një rajon tashmë të brishtë”, ka shkruar Price.
“Ne i bashkohemi BE-së për t’i bërë thirrje Kosovës që të pezullojë menjëherë çdo masë të planifikuar që do të përshkallëzonte tensionet, përfshirë vendosjen e gjobave të automjeteve”, ka shtuar ai.
Price ka përfunduar duke thënë se Kosova dhe Serbia duhet t’i “përmbushin detyrimet e tyre sipas dialogut të lehtësuar nga BE dhe të angazhohen në mënyrë konstruktive për të arritur një zgjidhje të qëndrueshme”.