Në datat 28 dhe 29 tetor pritet të zhvillohet në Tiranë Takimi i 20-të i Komitetit Parlamentar të Stabilizim-Asociimit (KPSA) ndërmjet Shqipërisë dhe Bashkimit Evropian. Aktiviteti do të mbahet në ambientet e hotelit “Mak Albania”, në sallën “Iliria”, dhe do të udhëhiqet nga Taulant Balla, kryetar i delegacionit të Kuvendit të Shqipërisë, dhe Marco Tarquinio, kryetar i delegacionit të Parlamentit Evropian.
Takimi do të hapet me fjalët përshëndetëse të Kryetarit të Kuvendit Niko Peleshi, Ministres për Evropën dhe Punët e Jashtme Elisa Spiropali, Ambasadorit të Polonisë në Shqipëri Wojciech Unolt në emër të Presidencës Daneze të Këshillit të BE-së, Ambasadorit të BE-së në Shqipëri Silvio Gonzato në emër të Komisionit Evropian, si dhe Raportuesit të Përhershëm të Parlamentit Evropian për Shqipërinë, Andreas Schider.
Takimi do të zhvillohet në dy sesione:
-
Sesioni i parë, më 28 tetor nga ora 17:00 deri në 19:30, do të fokusohet në negociatat e anëtarësimit të Shqipërisë me BE-në, politikën e jashtme, marrëdhëniet e fqinjësisë së mirë dhe bashkëpunimin rajonal, si dhe progresin në sektorët e ekonomisë, energjisë, mjedisit dhe turizmit.
-
Sesioni i dytë, më 29 tetor nga ora 10:00 deri në 12:30, do të trajtojë forcimin e shtetit të së drejtës, luftën kundër korrupsionit dhe krimit, respektimin e të drejtave të njeriut, të minoriteteve dhe lirisë së medias, si dhe do të diskutojë datën dhe vendin e takimit të ardhshëm të KPSA-së.
Ky aktivitet pritet të zhvillohet në një klimë bashkëpunimi të thelluar mes Shqipërisë dhe Bashkimit Evropian, duke theksuar përparimet dhe sfidat që shoqërojnë procesin e integrimit evropian të Shqipërisë.