Policia e Kosovës ka arrestuar dy persona në Ferizaj dhe Kaçanik nën dyshimin se i kanë sulmuar dhe kanosur zyrtarët policorë.
Në raportin 24-orësh të Policisë së Kosovës, në rastin në Ferizaj, për të dyshuarin kishte pasur një ankesë nga një qytetar që kishte thënë se i dyshuari i ka hyrë në pronën private dhe e ka kanosur.
Më pas, i dyshuari ka sulmuar tre policë, të cilët kanë pranuar trajtim mjekësor.
I dyshuari është dërguar në mbajtje.
“Ankuesi mashkull kosovar ka informuar se i dyshuari mashkull kosovar ka hyrë në pronën private dhe e ka kanosur atë. I dyshuari më pas ka sulmuar edhe zyrtarët policorë. Lidhur me rastin, tre zyrtarë policorë kanë pranuar tretman mjekësor. Me vendim të prokurorit i dyshuari është arrestuar dhe dërguar në mbajtje”, thuhet në raportin e PK-së.
Ndërsa në Kaçanik, një i dyshuar është shoqëruar në polici, pasi kishte kanosur zyrtarin policor që i kishte shqiptuar gjobë trafiku.
Rasti ka shkuar në procedurë të rregullt.
“Është shoqëruar në stacionin policor i dyshuari mashkull kosovar, i cili pasi i është shqiptuar një gjobë trafiku, ka kanosur zyrtarin policor që ishte në kryer të detyrës zyrtare. Me vendim të prokurorit rasti shkon në procedurë të rregullt”, thuhet në raportin e PK-së.