Presidentja e vendit, Vjosa Osmani, ka njoftuar se ka pranuar ftesën personale të Presidentit të Shteteve të Bashkuara të Amerikës, Donald Trump, për të përfaqësuar Kosovën në Bordin e Paqes, si anëtare themeluese.
Osmani e cilëson këtë ftesë si një nder të madh dhe thekson se Kosova do të qëndrojë krah për krah me SHBA-të në misionin për ndërtimin e një bote më të sigurt, njofton Dukagjini.
“Jam thellësisht e nderuar nga ftesa personale e Presidentit Trump për të përfaqësuar Republikën e Kosovës në Bordin e Paqes, si anëtare themeluese, krah për krah me SHBA-të në misionin për një botë më të sigurt. Lidershipi i guximshëm nuk flet thjesht për paqe, ai e ndërton atë. Pikërisht këtë po e bën Presidenti Trump nëpërmjet kësaj iniciative historike.
Osmani rikujtoi gjithashtu rolin vendimtar të Shteteve të Bashkuara në sjelljen e paqes në Kosovë, duke nënvizuar se sot Kosova mbetet një aleate e palëkundur e Amerikës për të avancuar më tej paqen globale.
“Ashtu si Amerika që solli paqe në Kosovë, sot Kosova qëndron si aleat i palëkundur i saj për ta çuar paqen më tej. Historia i mban mend ata që bëjnë hapa të guximshëm në ndërtimin e paqes – dhe ne jemi gati”, ka shkrua Osmani.
