Qyteti i Ferizajt ishte tronditur në orët e para të së shtunës së 28 majit.
Nga përplasjet verbale, mospajtimet ndërmjet dy personave eskaluan deri në përdorim të armës së zjarrit.
Krejt ngjarja përfundoi me fatalitet.
Vrasjen e Gazmend Hysenit dyshohet që e kreu ferizajasi Qendrim Januzi, po ashtu 30-vjeçar.
Në vendin ku ka ndodhur krimi rastësisht ka qëlluar një polic me rroba civile, i cili, sipas Policisë, për të shmangur rrezikun ka plagosur të dyshuarin.
“Në afërsi të vendit të ngjarjes një njësi policore e ka vërejtur të dyshuarin, pasi kanë dëgjuar të shtëna me armë zjarri dhe e ka paralajmëruar që të ndaloj por i njëjti nuk i është përfillur urdhrave të policisë, në këtë rast për tu vetëmbrojtur zyrtari policior ka shtirë në drejtim të të dyshuarit me ç’rast është mbetur i plagosur”, Kanun Veseli – Zëdhënës i Policisë, Ferizaj.
Më pas Januzi është arrestuar dhe ndaluar për 48 orë nën dyshimin për kryerje të veprës së rëndë.
Januzi, siç mëson RTV Dukagjini është vëllai i rep artistit Betim Januzi i cili njihet me nofkën “Buta”.
Mirëpo shkaku që nxiti këtë ngjarje të rëndë është akoma i paqartë edhe për Prokurorinë e Ferizajt.
“Motivet lidhur me këtë ngjarje ende nuk dihen. Trupi i pa jetë i viktimës me urdhër të prokurorit është dërguar për obduksion në Institutin e Mjekësisë Ligjore në Prishtinë. Prokuroria Themelore në Ferizaj, ndaj të njëjtit, brenda afatit ligjor, do të paraqesë edhe kërkesën për caktimin e masës së paraburgimit në Gjykatën Themelore në Ferizaj”, thuhet në komunikatën e Prokuroria Themelore e Ferizajt.
Dëshmitarët e këtij rasti nuk kanë pranuar të flasin para kamerës.
Mirëpo, prapa saj i kanë thënë televizionit se dorasi dhe viktima kohë më parë ishin shokë të afërt.
Ata dyshojnë që këtë ngjarje e ka sjell një ngatërresë që dy personat kishin pasur së fundmi.