Komisioni Qendror i Zgjedhjeve (KQZ), ka bërë të ditur se mbi 50 për qind e votave që i përkasin votimit nga jashtë vendit tashmë janë numëruar.
Sipas njoftimit të KQZ-së, nga pasditja e së premtes deri të dielën në orën 16:00 janë numëruar gjithsej 147 kuti votimi – prej të cilave 80 kuti që përmbajnë fletëvotime për zgjedhjet për kryetarë komunash, dhe 67 kuti të tjera për kuvendet komunale.
“Nga pasditja e së premtes deri të dielën në orën 16:00, janë numëruar 80 kuti që përmbajnë pakot me fletëvotime të supozuara nga zgjedhjet për Kryetarë të Komunave dhe 67 kuti të tjera nga zgjedhjet për Kuvendet Komunale. Numri i përgjithshëm i fletëvotimeve që janë numëruar deri më tani është mbi 50% e tyre”, thuhet në njoftimin e KQZ-së.
Në platformën e KQZ-së për rezultate https://resultslocal2025.kqz-ks.org/ kanë filluar të publikohen rezultatet nga numërimi i votave nga votimi jashtë Kosovës.