Të hënën e tetë gushtit, një operacion masiv është zhvilluar nga Policia e Vlorës në bashkëpunim me Guardia di Finanza(GDF).
Gjatë këtij operacioni të zhvilluar nga ajri, deti dhe toka u sekuestruan rreth një ton lëndë e dyshuar narkotike marihuana, ku si pasojë janë vënë në pranga tre shtetas shqiptarë banues në Vlorë, ndërsa një tjetër është shpallur në kërkim, raporton Top Channel.
Policia e Vlorës ka sekuestruar tri mjete lundruese (skafe) dhe dy automjete, ndërsa nga GDF u sekuestrua mjeti lundrues në të cilin u gjet lënda narkotike.
Drejtoria Vendore e Policisë në Vlorë, në bashkëpunim me Guardia di Finanza, bazuar në informacionet e marra nga strukturat hetimore të Policisë së Shtetit, se disa shtetas kishin transportuar drejt një mjeti lundrues një sasi lënde narkotike, kanë organizuar dhe finalizuar me sukses operacionin e koduar “SYRI”.
Në operacion janë përfshirë rreth 250 forca policore, të cilat zhvilluan kontrolle dhe ndjekje nga toka, deti dhe nga ajri me helikopter të GDF-së dhe Frontex-it.
Kontrollet u finalizuan me bllokimin e mjetit lundrues që kishte lëndën narkotike dhe arrestimin e personave që kishin organizuar trafikimin e saj.
Si rezultat i operacionit, nga shërbimet e Policisë së Shtetit u bë i mundur identifikimi i personave që dyshohet se kishin transportuar lëndën narkotike me 3 mjete lundruese, drejt një mjeti tjetër lundrues në thellësi të detit.
Nga Policia e Vlorës u bë kapja dhe arrestimi në flagrancë i shtetasve me iniciale A. S., 31 vjeç, S. I., 22 vjeç dhe Q. P., 19 vjeç, si dhe u bë shpallja në kërkim e shtetasit G. L., 33 vjeç, të katërt këta banues në Vlorë.
Gjithashtu, gjatë operacionit u kapën në flagrancë, në ujërat italiane, nga Guardia di Finanza, shtetasit me iniciale B. S., 43 vjeç dhe S. S., 62 vjeç, të dy me shtetësi ukrainase.
Shtetasit e arrestuar në Vlorë, në bashkëpunim me njëri-tjetrin, më 7 gusht rreth orës 15:00, dyshohet se kanë transportuar lëndën e dyshuar narkotike marihuanë, me 3 skafe drejt një mjeti tjetër lundrues, në thellesi të ujërave të detit Jon dhe më pas e kanë nisur atë drejt Italisë.
Si rezultat i zhvillimit të operacionit të përbashkët, nga autoritetet e Guardia di Finanza është kapur në ujërat italiane mjeti lundrues me të cilin transportohej lënda narkotike.
Shërbimet e GDF-së, gjatë kontrollit në bordin e mjetit lundrues, kanë sekuestruar një sasi prej 992 kg lëndë të dyshuar narkotike marihuanë, e ndarë në 153 pako.
Në vijim të operacionit, gjatë kontrollit në banesën e shtetasit S. I. në Vlorë, shërbimet e DVP Vlorë gjetën dhe sekuestruan një sasi lënde të dyshuar narkotike kanabis, sekuestruan 3 mjete lundruese (skafe), 3 aparate celulare dhe 2 automjete.
Nën drejtimin e Prokurorisë, pranë Gjykatës së Shkallës së Parë Vlorë, vijon puna për dokumentimin e plotë të këtij rasti, kapjen dhe vënien në pranga të personave të tjerë të implikuar në trafikimin e lëndës narkotike.