Presidentja e Kosovës, Vjosa Osmani në një intervistë për mediumin ndërkombëtar BBC, ka folur për situatën në Veriun e Kosovës.
Ajo ka thënë se Kosova asnjëherë nuk ka qenë fajtore për eskalimin e situatës në dhunë. Ajo është shprehur se përshkallëzimi dhe dhuna ka ardhur nga Serbia e cila sipas saj kontrollohet nga Rusia.
“Por duhet të kuptojmë se jetojmë afër një fqinji që kontrollohet plotësisht nga Rusia. Ata po luftojnë mënyrën tonë demokratike të jetës, kjo është një luftë kundër vlerave me të cilat jetojmë cdo ditë dhe të cilat qëndrojnë në themelet e shtetit tonë të pavarur”, ka deklaruar Osmani për BBC Newsnight.
Ajo e ka akuzuar presidentin e Serbisë Aleksandër Vuçiq, duke thënë se është duke i mbështetur strukturat kriminale serbe në Veri të Mitrovicës. Me këto veprime, sipas saj, presidenti i Serbisë është duke e dëmtuar më së shumti pakicën serbe në atë pjesë.
“Në dekadën e fundit Vuciq ka drejtuar Serbinë, por veçanërisht në muajt e fundit ku ata vazhduan t’i mbështesin strukturat ilegale në Veri të Kosovës të cilat përbëhen nga banda kriminale. Nëpërmjet tyre duke i manipuluar, ata janë duke e mbajtur pakicën serbe që jeton në Kosovë peng të këtyre politikave të gabuara”, ka thënë ajo.
Presidentja e Kosovës e ka ritheksuar se veprimet e Serbisë në Kosovë janë të nxitura dhe të ndihmuara nga Rusia, për ta përshkallëzuar situatën në Ballkanin Perëndimor dhe në veçanti në Kosovë.