Presidentja e Republikës së Kosovës, Vjosa Osmani ka përkujtuar në 23 vjetorin e rënies heroin Agim Ramadani.
Agim Ramadani, është simbol i lirisë, guximit dhe përbashkimit. Lirinë e portretizuar me vargje e brushë, e bëri realitet me angazhimin e tij në UÇK, duke qenë një ndër shtyllat e operacionit “Shigjeta”, me të cilin u thye kufiri ndërmjet Kosovës e Shqipërisë , kështu thuhet në përkujtim e presidentes Osmani.
Siç thotë ajo, në 23-vjetorin e rënies, fjalët janë të pakta në krahasim me veprën e heroit të papërsëritshëm.
Sot përkulemi para veprës së tij dhe e kujtojmë më respekt heroin që i dha kuptim dhe formë lirisë sonë”, ka shtuar ndër të tjera ajo.
Osmani ka theksuar se Agimi e realizoi ëndrrën për lirinë që ne të jetojmë të lirë, falë tij e bashkëluftëtarëve.
“Çdo përvjetor do të na sjellë në vëmendje vlerën e lirisë, heroizmin dhe pavdekësinë e tyre. Qoftë i përjetshëm kujtimi për heroin Agim Ramadanin”, ka thënë Presidentja në përkujtimin e saj.
Heroi, gjatë luftës ishte dëshmuar si strateg i lartë dhe udhëheqës i dashur për ushtarët.
Ai ishte njëri ndër hartuesit e planit për thyerjen e kufirit shqiptaro-shqiptar, gjë të cilën edhe e ka bërë bashkë me shokët.
Agim Ramadani, i lindur në Zhegër të Gjilanit, më 3 maj 1963, shkollimin fillor e kishte kryer në vendlindje, të mesmen në Gjilan në vitin 1980, ndërsa Akademinë ushtarake-drejtimi i komunikacionit në Zagreb të Kroacisë.
Gjatë luftës ishte dëshmuar si strateg i lartë dhe udhëheqës i dashur për ushtarët.
Ishte njëri ndër hartuesit e planit për thyerjen e kufirit shqiptaro-shqiptar dhe ishte i pari që kishte shkulur gurin-piramidën-kufitare në Koshare.
Pas thyerjes së kufirit, në pjesën e Kosovës, te vendi i quajtur Rrasa e Zogut, ai kishte rënë heroikisht duke mos vdekur kurrë.
Ramadani llogaritet si një nga heronjtë më të njohur të historisë së re shqiptare.
Në Gjilan para Teatrit Kombëtar i është ngritur një shtatore, në të cilën janë komponuar të gjitha elementet artistike dhe luftarake të Agim Ramadanit – Katanës.