Presidentja e Kosovës, Vjosa Osmani, të martën e 16 janarit do të presë në takim ministrin për Evropën dhe Punët e Jashtme të Republikës së Shqipërisë, Igli Hasani.
Sipas njoftimit për medie, takimi do të zhvillohet në orën 10:25.
Mediet mund të marrin pamje në fillim të takimit, përderisa nuk raportohet për deklarim për mediet.
Ndryshe, ministrja e Punëve të Jashtme dhe Diaporës, Donika Gërvalla, pas takimit me homologun e saj shqiptar, Igli Hasani, ka thënë se e ka falënderuar atë për vizitën dhe bisedën vëllazërore.
“Mesazhi që përçon kjo vizitë në këtë vend dhe në prag të datës 17 janar, 42-vjetorit të atentatit në Gjermani, shkon shumë përtej një vizite zyrtare të një Ministri të Punëve të Jashtme në një vend fqinj”, ka thënë Gërvalla.
Ajo ka thënë se Republika e Shqipërisë është partneri më i dashur dhe më i rëndësishëm i Republikës së Kosovës.
“Thellimi dhe forcimi i marrëdhënieve tona të shkëlqyeshme në të gjitha fushat, është jo vetëm amaneti i të parëve tanë, por i kontribuon zhvillimit të të dy vendeve tona dhe stabilitetit dhe paqes afatgjatë të rajonit tonë”, është shprehur ministrja.
Gërvalla ka njoftuar se nesër nga ora 09:00 do të kenë takim në Ministrinë e Punëve të Jashtme dhe Diasporës, dhe pas takimit do të deklarohen për medie.