Presidentja e Republikës së Kosovës, Vjosa Osmani, ka pritur sot në takim ambasadorin e Republikës Federale të Gjermanisë në Kosovë, Jorn Rohde, për të diskutuar zhvillimet më të fundit politike në vend dhe marrëdhëniet ndërmjet dy vendeve.
Siç thuhet në njoftimin e Presidencës, në qendër të takimit ishte procesi i konstituimit të institucioneve të reja të Kosovës.
Osmani dhe ambasadori Rohde diskutuan për implikimet që sjell vonesa në formimin e institucioneve.
“Në fokus të takimit ishin zhvillimet e fundit politike në vend, me theks të veçantë te procesi i konstituimit të institucioneve të reja. Me këtë rast, u diskutua edhe për implikimet e moskonstituimit të institucioneve në procese të tjera të rëndësishme për vendin”, thuhet në njoftim.
Gjithashtu, në takim u trajtuan mundësitë për thellimin e mëtejshëm të marrëdhënieve bilaterale Kosovë-Gjermani.
“Gjatë diskutimit, u trajtuan gjithashtu mundësitë për thellimin e mëtejshëm të marrëdhënieve bilaterale ndërmjet Kosovës dhe Gjermanisë, në dritën e një qeverie të re në Gjermani, si dhe për angazhimin e përbashkët në fusha të ndryshme me interes të ndërsjellë.
Presidentja Osmani falënderoi Gjermaninë për mbështetjen e vazhdueshme ndaj Kosovës dhe rikonfirmoi gatishmërinë për thellimin e mëtejshëm të bashkëpunimit në dobi të të dyja vendeve”, thuhet më tej në njoftim.