Presidentja e Kosovës, Vjosa Osmani ka thënë se pritshmërit e natyrshme të Kosovës ndaj procesit të dialogut me Serbinë qëndrojnë tek njohja reciproke. Mirëpo, me rritjen e intensifikimit të rolit të Gjermanisë dhe Francës për përparimin e dialogut, Osmani ka thënë se qëndron në interes të Serbisë që dialogu në mes dy vendeve të zvarritet.
E ftuar në Zërin e Amerikës, Osmani ka thënë se ajo çfarë po ndodh në Ukrainë, do të duhej të jetë një mësim për të gjitha shtetet perëndimore, se me shtetet e tilla që udhëhiqen nga mendësinë e Putinit e e këtu ajo përfshin edhe vetë Serbia që udhëhiqet nga një ish ministër i Millosheviqit, duhet gjuhë e qartë dhe vetëm veprime të kësaj natyre.
“Gjysmë zgjidhjet në fakt asnjëherë nuk prodhojnë paqe dhe stabilitet afatgjatë, por në anën tjetër i japin hapësirë të mjaftueshme Serbisë që të vazhdojë të afrohet më shumë me Rusinë dhe po ashtu të investojë edhe më shumë në destabilizimin e rajonit tonë”, tha presidentja Osmani, duke shtuar se “për fat të keq edhe kjo që po ndodh tashmë në Ukrainë, që nga 24 shkurti i vitit 2022, po dëshmon se shtetet autokratike, siç është Serbia, siç është Rusia e cila e kontrollon edhe Serbinë, asnjëherë nuk shquhen për veprime pozitive në raport me fqinjët e tyre, përkundrazi, Serbia vetëm sa është forcuar në veprimet e saj destabilizuese”.
Sipas Presidentes Osmani, rritja e bashkëpunimit qoftë politik apo atij ushtarak në mes Rusisë dhe Serbisë, rrjedhshëm do të ndikojë në rritjen e ndikimit rus në rritjen e ndikimit rus në tërë rajonin.
“Ka një rritje të interes të Gjermanisë dhe Francës për të intensifikuar dialogun. Mos harroni se është interes i Serbisë që të zvarrisë procesin e dialogut dhe zgjidhjen përfundimtare. Interes i Serbisë është që procesi të vazhdojë me dhjetëra apo qindra vite që Kosova të mbahet peng”, deklaroi Osmani.