Pas më shumë se një ore, ka përfunduar takimi në mes të presidentes së Republikës së Kosovës, Vjosa Osmani-Sadriu dhe të dërguarit të posaçëm të Shteteve të Bashkuara të Amerikës për Ballkanin Perëndimor, Gabriel Escobar, si dhe atij të Bashkimit Evropian për dialogun Kosovë-Serbi, Miroslav Lajçak.
Pas takimit, asnjëra palë nuk është deklaruar për media, derisa të dy emisarët janë drejtuar drejt zyrës së BE-së në Prishtinë. Ata pritet të takohen me tre liderët opozitarë.
Në zyrat e BE-së kanë mbërritur, kryetari i PDK-së, Memli Krasniqi, kryetari i AAK-së, Ramush Haradinaj dhe ai i LDK-së, Lumir Abdixhiku.
Pas takimit me liderët opozitarë, dy emisarët do të zhvillojnë edhe një takim me përfaqësuesit e Listës Serbe.
Ende pa përfunduar takimi në mes të dy emisarëve dhe partive opozitare, në zyrën e Bashkimit Evropian në Prishtinë ka mbërritur edhe Goran Rakiç, kryetar i Listës Serbe.
Takimi në mes të Rakiçit e emisarëve pritet të fillojë pas takimit të opozitës.
Vizita e tyre në Kosovë, ajo e Lajçak dhe Escobar, po zhvillohet pas një jave me zhvillime në komunat në veri të vendit, aty ku pati protesta si pasojë e zgjedhjes së kryetarëve të rinj, të cilët nuk po lejoheshin të hynin në objektet e komunave nga protestuesit.
Mbrëmjen e së hënës, Lajçak dhe Escobar kanë zhvilluar një takim me kryeministrin Albin Kurti. Këtij të fundit ia kanë shprehur tri kërkesat e ndërkombëtarëve për të depërshkallëzuar situatën në veri.
Pas Kosovës, dy emisarët do të shkojnë në Serbi.