Një pilot i Forcave të Armatosura të Kroacisë dhe e dashura e tij, shtetase serbe nga Kosova, janë arrestuar nën dyshimet për spiunazh.
Sipas mediave kroate, piloti dyshohet se ka kaluar informacione të ndjeshme të mbledhura gjatë qëndrimit në Kosovë te partnerja e tij, e cila më pas ia ka përcjellë drejtuesve të Listës Serbe, forcë politike që bashkëpunon ngushtë me qeverinë e Serbisë dhe presidentin Aleksandar Vuçiq.
Kryeministri kroat, Andrej Plenkoviq, ka konfirmuar se ka diskutuar rastin me drejtorin e Agjencisë së Inteligjencës së Sigurisë Ushtarake të Kroacisë (VSOA), Gjeneral Major Ivan Turkalj.
“Prita drejtorin e VSOA-s lidhur me hetimin që po zhvillohet kundër një oficeri të ushtrisë kroate dhe një personi tjetër, nën dyshimin për kryerjen e krimit të spiunazhit”, ka shkruar Plenkoviq në platformën X.
Ai ka shtuar se VSOA, së bashku me Zyrën e Prokurorit të Shtetit dhe institucionet e tjera kompetente, janë duke ndërmarrë të gjitha veprimet e nevojshme për të mbrojtur interesat shtetërore dhe sigurinë kombëtare.