Policia e Kosovës ka njoftuar se duke iu referuar urdhrit operativ të përgatitur për festat e fundvitit dhe fillimin e vitit të ri 2024, dhe bazuar në rastet e raportuara, vlerëson se ka kaluar “një festë kryesisht e qetë dhe pa incidente madhore”.
“Në fokus të këtij urdhri operativ, përveç ruajtjes së rendit dhe sigurisë publike, ka qenë mbikëqyrja dhe kontrolli në trafikun rrugor, menaxhimi i pikave kufitare, përfshirë aeroportin ndërkombëtar”, thuhet në njoftimin e Policisë së Kosovës.
Tutje, në njoftim thuhet se duke u bazuar në raportimet e pranuara nga Drejtoritë Rajonale Policore, nata e vitit të ri, ndërrimi i mot moteve, ka kaluar kryesisht i qetë, nuk është raportuar ndonjë rast apo incident madhor me pasoja fatale, megjithëse në disa rajone janë raportuar disa incidente me lëndime trupore dhe dëme materiale si pasojë e përdorimit pakujdesshëm të mjeteve piroteknike dhe armëve të zjarrit.
“Mund të veçohet një rast në Prishtinë, i cili në konsultim me prokurorin, policia e ka iniciuar si ‘shkaktim i rrezikut të përgjithshëm’, ku një plumb bredhës ka goditur një qytetare, e cila është dërguar për trajtim mjekësor, dhe sipas mjekëve, është jashtë rrezikut për jetë”, vijon aty.
Njëherit, Policia e Kosovës ka uruar të gjithë qytetarët që ky vit i ri (2024) të jetë vit i mbarë për të gjithë, të jetë vit i vazhdimit të bashkëpunimit dhe transparencës, gëzimit të lirisë dhe të drejtave njerëzore pa dallim, ku qytetarët e të gjitha komuniteteve të jetojnë dhe veprojnë të sigurt, të qetë dhe në harmoni të plotë me njëri-tjetrin.