Një aksident fatal ka ndodhur sot më 26 shtator 2025, rreth orës 14:05, në fshatin Treboviq të Pejës.
Sipas Policisë së Kosovës, në aksident ishin të përfshira një veturë dhe një motoçikletë.
Dyshohet se drejtuesi i motoçikletës, pasi humbi kontrollin në një kthesë, kaloi në shiritin e kundërt të rrugës dhe u përplas me veturën që po lëvizte në drejtim të kundërt.
“Deri te aksidenti dyshohet se ka ardhur, deri sa drejtuesi i motoçikletes pasi humb kontrollin në njëkthesë ( i dyshuar) gjatë përball kalimit kalon në shiritin e kundërt të rrugës me ç’rast e godet veturën e cila ishte duke lëvizur në drejtim të kundërt. Si pasojë e përplasjes, drejtuesi i motoçikletës ka ndërruar jetë në vendin e ngjarjes”, thuhet në njoftimin e ri të Policisë së Kosovës.
Vdekja e tij është konstatuar nga ekipi mjekësor, ndërsa një tjetër person i lënduar është dërguar me autoambulancë në Spitalin Rajonal të Pejës, ku po trajtohet.
Me urdhër të prokurorit të shtetit, trupi i pajetë i viktimës është dërguar në Institutin e Mjekësisë Ligjore në Prishtinë për obduksion.
Njësitet e komunikacionit rrugor të Policisë së Kosovës kanë dalë në vendin e ngjarjes dhe po hetojnë rrethanat e aksidentit./Telegrafi