Policia e Kosovës ka bërë të ditur se të hënën në pikën kufitare në Gjilan, kanë pranuar informacione se nga territori i Serbisë ka hyrë një automjet i dyshuar, i ngarkuar me mallra që dyshohet të jenë të kontrabanduara.
Automjeti i dyshuar ka qenë me targa serbe dhe i njëjti ka hyrë në Kosovë përmes rrugëve ilegale.
Gjatë kontrollit të veturës nga policia, aty janë gjetur 676 pako me barna të llojeve të ndryshme.
“Pas pranimit të informacioneve njësitë patrulluese kompetente kanë ndërmarrë veprime për ndalim të mjetit të dyshuar me ç’rast kanë vendosur një pikë kontrolli vëzhguese, ku si rezultat është arritur që të ndalohet automjeti i dyshuar, me targa serbe, i cili kishte hyrë në Kosovë përmes rrugëve ilegale. Gjatë kontrollimit të veturës janë gjetur gjithsej 676 pako me barna të llojeve të ndryshme”, thuhet në njoftimin e Policisë së Kosovës.
Lidhur me rastin është konsultuar prokurori, dhe sipas policisë me urdhër të tij personi i dyshuar është ndaluar për 48 orë, ndërsa malli dhe automjeti janë sekuestruar për procedura të mëtejme.