Policia e Shqipërisë ka zbarkuar në kompleksin e pallateve të ndërtuara nga Jamarbër Malltezi, dhëndri i Sali Berishës, në truallin ku dikur ishte kompleksi “Partizani”.
Në këtë kompleks kanë shkuar zyrtarët policorë dhe hetuesit e krimeve ekonomike, për të bërë ekzekutimin e vendimit të dhënë nga Gjykata e Posaçme për sekuestrim.
“Oficerët e Policisë Gjyqësore dhe Krimit Ekonomik kanë ardhur në komplekin ‘Magnet’, në pronësi të Jamarbër Malltezit, për të ekzekutuar vendimin e dhënë nga gjykata për sekuestrimin e këtij kompleksi. Janë një grup të oficerëve të Policisë Gjyqësore. Ata po drejtohen në zyrat kryesore të kompleksit ku do të kryejnë edhe procedurat, por edhe njoftimin sa i përket vendimit të gjykatës. Në momentet që do të kryhen të gjitha procedurat në këtë kompleks, Jamarbër Malltezit nuk do t’i lejohen që të kryejë veprime të tjera, sa i përket ndryshimit të pronësisë apo shitjes së kompleksit”, shkruan AbcNews.
Tutje, sipas tyre, aty do të “sekuestrohen edhe certifikatat e pronësisë sa i përket ish- kompleksit ‘Partizani’. Bëhet fjalë për 25 prona në total për të cilat gjykata ka vendosur sekuestro preventive. Për pasuri të tjera, bëhet fjalë për 6 llogari bankare të Jamarnër Malltezit. Banorët nuk do të preken nga kjo sekuestro preventive, vetëm ekzekutimi i gykatës për sekuestro të kompleksit në emër të Jamarbër Malltezit”.
Ndryshe, ditën e djeshme, gjykata vendosi të lërë në burg Jamarbër Malltezi, ndërsa ish- kryeministri Sali Berisha është thirrur këtë të martë në orën 14:00.