Policia e Kosovës ka njoftuar se sot se ka zbuluar një plantacion me rreth 500 bimë të llojit kanabis sativa në një fshat të rajonit të Gjilanit.
Operacioni është zhvilluar nga Drejtoria për Hetimin e Trafikimit me Narkotik, Njësia Gjilan, në bashkëpunim me institucione tjera të sigurisë.
Sipas njoftimit, bimët narkotike ishin të mbjella në katër sera dhe ndodheshin në një fazë të mirë zhvillimi.
Gjatë kontrollit policor, përveç plantacionit, është gjetur dhe konfiskuar edhe një armë e gjatë si dhe dëshmi tjera të rëndësishme për hetimin.
Në lidhje me rastin janë arrestuar tre persona të dyshuar, të cilët me vendim të prokurorit janë dërguar në mbajtje për 48 orë. Prokurori kujdestar është njoftuar menjëherë, ndërsa shkatërrimi i lëndëve narkotike do të bëhet në koordinim me organet përkatëse.
Policia thekson se aksionet e këtij lloji do të vazhdojnë në kuadër të luftës kundër narkotikëve dhe trafikimit të paligjshëm.