Me ftesë të Presidentit të Këshillit Evropian, Charles Michel dhe kryeministrit të Çekisë, Petr Fiala, presidentja e Kosovës, Vjosa Osmani, do ta përfaqësojë Kosovën në samitin e parë të Komunitetit Politik Evropian (EPC).
Presidentja Osmani ka thënë se para “liderëve evropianë, do ta përçojë mesazhin e përkushtimit të palëkundur të popullit dhe institucioneve të Republikës së Kosovës për integrimin euroatlantik të Kosovës si garanci për paqe të qëndrueshme në rajon dhe më gjerë”.
“Komuniteti Politik Evropian është platformë për koordinim politik, e krijuar mbi bazën e propozimit të presidenti francez, Emmanuel Macron dhe në të cilën do të bashkohen liderët e 27 vendeve anëtare të Bashkimit Evropian (BE) dhe liderët e 17 vendeve të tjera evropiane”.
“Kjo nismë synon nxitjen e dialogut dhe bashkëpunimit për çështje me interes të përbashkët, forcimin e sigurisë, stabilitetit dhe prosperitetit në kontinentin evropian”.
Sipas komunikatës se Zyrës së Presidentes së Kosovës, gjatë takimeve bilaterale me liderët e Bashkimit Evropian, Osmani do të diskutojë edhe për anëtarësimin e Kosovës në organizata ndërkombëtare.
Ky takim inaugurues do të mbledhë krerë shtetesh nga 44 vende të kontinentit evropian me qëllim të nxitjes së dialogut politik dhe forcimit të bashkëpunimit për t’i adresuar çështjet më urgjente të sigurisë dhe stabilitetit në Evropë.