Eksperti i çështjeve të Ballkanit Perëndimor, Alon Ben Meir, ka thënë se problemet në pjesën veriore të Kosovës mund të zgjidhen vetëm anë të koncesionit.
Me anë të një postimi në Twitter, profesori në Universitetin e New Yorkut, Alon Ben Meir, konsideroi se në këtë pikë, është e nevojshme që të dyja palët të lëvizin nga pozicionet e tyre aktuale.
“Të gjitha çështjet konfliktuoze që lidhen me pjesën veriore të Kosovës janë të zgjidhshme me kusht që të dyja palët, Kosova dhe Serbia, të bëjnë disa lëshime të nevojshme për të arritur një marrëveshje. Por, për sa kohë që ata qëndrojnë në pozicionin e tyre aktual, sigurisht që nuk mund të arrihet asnjë marrëveshje”, shkroi ai.
All the conflicting issues related to the northern part of Kosovo are resolvable provided that both sides, #Kosovo and #Serbia, make certain concessions necessary to reach an agreement. But as long as they hold onto their current position, certainly no agreement can be reached. pic.twitter.com/g2cm87PS6k
— AlonBenMeir (@AlonBenMeir) January 8, 2023
Ndryshe, Ben Meir, teksa kishte folur rreth zhvillimeve të fundit në veriun e Kosovës, ka thënë se nuk do të ketë zgjidhje të tensioneve midis dy vendeve, nëse Shtetet e Bashkuara të Amerikës dhe Bashkimi Evropian nuk angazhohen në zgjidhje përfundimtare.
Në të kundërtën, sipas tij, veriu i Kosovës gjithmonë do të jetë një problem midis dy vendeve fqinje.
“Nuk do të ketë zgjidhje për konfliktin mes vendeve për qeverisjen e kësaj zone, nëse nuk fokusohen me mbështetjen dhe ndërmjetësimin e BE-së dhe SHBA-së, në arritjen e një marrëveshjeje përfundimtare”, ka shkruar ai në Facebook.
Sipas profesorit amerikan, një nga arsyet e problemit është Asociacioni i komunave me shumicë serbe.