Prokuroria Themelore në Prishtinë, në bashkëpunim me Policinë e Kosovës, ka nisur hetime intensive pas gjetjes së një trupi të pajetë të groposur në Komunën e Lipjanit.
“Lidhur me rastin e raportuar të personit të zhdukur në Komunën e Lipjanit, më datë 04.08.2028 është gjetur një trup i pajetë. Aktualisht janë duke u ndërmarrë veprime hetimore intensive nga ana e Prokurorisë Themelore në Prishtinë në bashkëpunim me Policinë e Kosovës, me qëllim të zbardhjes së plotë të rrethanave të rastit”, thuhet në përgjigjen e Prokurorisë për Dukagjinin.
Viktima dyshohet të jetë Enver Bajraktari, i cili ishte raportuar i zhdukur më herët.
Më 4 gusht, viktima është gjetur i vdekur dhe i groposur në një arë në fshatin Baincë.
Sipas raportit të policisë, trupi është gjetur rreth orës 12:05, në një arë të këtij fshati, ndërsa nga ekzaminimi paraprak i Institutit të Mjekësisë Ligjore (IML) rezulton se trupi është “i freskët”, pra vdekja ka ndodhur së fundmi.
Policia ka intervistuar katër dëshmitarë lidhur me rastin, ndërsa hetimet janë duke vazhduar.