Prokuroria Themelore në Ferizaj ka dhënë detaje lidhur me rastin e vrasjes që ndodhi mbrëmë rreth orës 19:42, në fshatin Balaj të Ferizajt.
Sipas njoftimit, prokurori kujdestar nga Departamenti për Krime të Rënda ka dalë në vendin e ngjarjes dhe në bashkëpunim me Policinë dhe njësitë relevante ka ndërmarrë veprime hetimore për të ndriçuar rrethanat e rastit.
Me vendim të prokurorit të shtetit, i dyshuari B.R. është ndaluar për 48 orë nën dyshimin për kryerjen e veprës penale “Vrasja”, sipas Kodit Penal të Republikës së Kosovës.
Ndërkohë, trupi i pajetë i viktimës, I.R., është dërguar në Institutin e Mjekësisë Ligjore në Prishtinë për obduksion.
Prokuroria ka bërë të ditur se po punon për të sqaruar të gjitha rrethanat dhe motivin e kësaj ngjarjeje, ndërsa brenda afatit ligjor do të kërkojë caktimin e masës së paraburgimit ndaj të dyshuarit.
Vrasje me armë në Balaj të Ferizajt, arrestohet një i dyshuar