Prokurorja e Specializuar, Kimberly West e ka mirëpritur aktgjykimin e Apelit në Dhomat e Specializuara në rastin kundër Salih Mustafës.
“Mirëpres aktgjykimin e sotëm i cili, me gjithë ndryshimin e vogël të dënimit të Z. Mustafa, përbën një fitore për drejtësinë dhe, në veçanti, për viktimat e Salih Mustafës dhe familjet e tyre”, ka thënë West.
Ndryshe, sot Gjykata e Apelit në Dhomat e Specializuara ka ulur dënimin e Mustafës nga 26 vjet burgim në 22 vjet burgim.
Vendimi është bërë i ditur nga kryetarja e trupit të Apelit, Michele Picard, të enjten, në sallën e gjyqit në Hagë, ku i pranishëm ishte edhe Mustafa.
Salih Mustafa, ishte dënuar në dhjetor të vitit të kaluar nga Gjykata Speciale, me 26 vjet burgim për vrasje të paligjshme, ndalim arbitrar dhe torturë.
“Gatishmëria e dëshmitarëve për të dëshmuar ishte kritike në këtë çështje gjyqësore dhe unë duartrokas kurajën e tyre, që dhanë dëshmi në sallën e gjyqit”, ka vijuar West.
Lexo edhe: Apeli ul në 22 vjet burgim dënimin ndaj Salih Mustafës