Kryeministri i Republikës së Kosovës, Albin Kurti, ka thënë se ajo çfarë duhet bërë në raport me Serbinë mbetet implementimi i marrëveshjes bazike.
Kurti është pyetur të premten rreth idesë së homologut të tij, Edi Rama, lidhur me mbajtjen e një konference ndërkombëtare për Kosovën e Serbinë. Ai ka thënë se të tilla janë mbajtur edhe në të kaluarën, duke theksuar se fokusi duhet të jetë në implementimin e dakordimeve të arritura.
“Ne kemi pasur konferenca ndërkombëtare në të kaluarën dhe tash kemi një marrëveshje bazike, nga 27 shkurti i këtij viti, në Bruksel dhe gjithashtu nga 18 marsi në Ohër me aneksin e zbatimit. Krejt çka duhet bërë është që pa kushte të implementohet ajo marrëveshje bazike në tërësinë e saj dhe në mënyrë fer e të balancuar. Kjo duhet të bëhet dhe për këtë ne angazhohemi në Bruksel në takimet që kemi”, tha Kurti para gazetarëve dje gjatë ditës në Prizren.
Rama tashmë ka dorëzuar një draft-statut për Asociacionin e Komunave me shumicë serbe, kurse para pak ditësh propozoi organizimin e një konference ndërkombëtare për dy shtetet.
Kjo ide ka gjetur përkrahjen e evropianëve.
Presidenti i Këshillit Evropian, Charles Michel, mbështeti idenë, kurse Rama mori lëvdata edhe nga emisari Miroslav Lajcak për angazhimin e tij.