Mijëra qytetarë izraelitë u mblodhën mbrëmjen e së enjtes në sheshin Habima të Tel Avivit për të protestuar kundër luftës në Gaza, duke kërkuar një marrëveshje armëpushimi dhe kthimin e pengjeve të mbajtura nga Hamasi.
Protestuesit, të cilët mbanin pankarta me mesazhe kundër luftës, bënin thirrje për përfundimin e menjëhershëm të konfliktit dhe kthimin e menjëhershëm të të rrëmbyerve. Pamjet nga mediat izraelite treguan turma të mëdha të qytetarëve që marshonin në qendër të qytetit.
Pas përfundimit të tubimit, disa prej pjesëmarrësve vazhduan protestën duke bllokuar rrugët përreth, çka solli përplasje me forcat e policisë. Autoritetet ndërhynë për të shpërndarë protestuesit dhe njoftuan për disa arrestime.
Protesta vjen në një kohë kur përpjekjet ndërkombëtare për ndërmjetësim dhe arritjen e një armëpushimi vazhdojnë, ndërsa opinioni publik brenda Izraelit mbetet gjithnjë e më i ndarë për menaxhimin e konfliktit në Gaza.