Për herë të katërt qytetarët serbë në Graçanicë po kundërshtojnë arrestimin e Dragisha Milenkoviqit, serb nga ky lokalitet ndaj të cilit është caktuar masa e paraburgimit për 30 ditë.
Në duart e tyre po mbajnë pankarta ku shkruhet se “Anamorava është me Vuçiqin”, “prej Anamoravës deri në Leposaviq jena një familje” e “liri për të gjithë serbët e arrestuar”.
I njëjti dyshohet për krime lufte, ndërsa shumë të burgosur shqiptarë Milenkoviqin e kujtojnë si gardian të dhunshëm e torturues në burgun e Prishtinës dhe të Lipjanit.
Sipas njoftimit të Policisë, i arrestuari, i identifikuar me iniciale D.M, dyshohet për veprën penale “krime lufte kundër popullsisë civile”.
Ai dyshohet se gjatë luftës në Kosovë, si gardian në burgun e Lipjanit “në mënyrë sistematike, ka ushtruar torturë, dhunë fizike, psikike, keqtrajtime dhe maltretime çnjerëzore dhe të skajshme për jetën ndaj të burgosurve shqiptarë”.
Ndryshe, Policia e Kosovës ka njoftuar se për shkak të protestës të së martës në Graçanicë, rruga kryesore nuk do të jetë e qarkullueshme për trafik.
“Policia e Kosovës, me qëllim të mbarëvajtjes së protestës së paralajmëruar, që do të mbahet sot në Graqanicë, duke filluar nga ora 11:30 e deri në përfundim të protestës, do të ridrejtojë trafikun për automjetet që qarkullojnë nga Prishtina në Gjilan dhe anasjelltas, pasi që rruga kryesore në Graqanicë nuk do të jetë e qarkullueshme për trafik deri në përfundim të protestës”.
Policia ka bërë thirrje që të përdoren rrugët alternative deri në përfundimin e protestës.