Qeveria e Kosovës pritet të mbajë mbledhje të mërkurën e 23 nëntorit duke filluar nga ora 10:00.
Kështu ka njoftuar Zyra e Kryeministrit.
Në këtë mbledhje do të shqyrtohen 20 pika të rendit të ditës, shkruan EO.
Sipas rendit të ditës, në këtë mbledhje do të shqyrtohet Projektligji për Pagat në Sektorin Publik si dhe Projektligji për Zyrtarët Publikë.
Po ashtu do të bëhet shqyrtimi i Projektligjit për Ratifikim e Marrëveshjes së Kredisë për Programin e Financave Publike dhe Rritjes Ekonomike ndërmjet Republikës së Kosovës dhe Fondit OPEC, për Zhvillim Ndërkombëtar (MFPT).
Kjo mbledhje vjen pikërisht në ditën ku në Bruksel do të takohen kryenegociatorët e Kosovës dhe Serbisë, Besnik Bislimi dhe Petar Petkoviq – nën ndërmjetësim të të dërguarit të Bashkimit Evropian për dialogun, Mirosllav Lajçak – për të diskutuar zgjidhjen për çështjen e targave ilegale serbe.